"Azərbaycanda qanunun aliliyi təmin olunur!" – Hüquqi nəticə olmadan səsləndirilən ittihamlar cəmiyyəti yanıltmamalıdır... Qanun və ədalət hər kəs üçün əsas meyardır!!!

Bu gün informasiya bolluğu dövründə sosial media platformalarında və bəzi xəbər resurslarında müxtəlif şəxslər, şirkətlər və sahibkarlar haqqında səsləndirilən ittihamlar cəmiyyət tərəfindən ciddi həssaslıqla qarşılanmalıdır. Təəssüf hissi ilə qeyd etmək lazımdır ki, bəzi hallarda jurnalist araşdırması adı altında qələmə alınan yazılar birtərəfli mövqedən təqdim olunur, qarşı tərəfin fikri tam dinlənilmədən ictimai rəydə müəyyən qənaətlər formalaşdırmağa xidmət edir. Halbuki, hüquqi dövlətdə hər bir fikir qanuna, sübuta və obyektivliyə söykənməlidir.
Azərbaycan Respublikasının Prezidenti, İlham Əliyev dəfələrlə çıxışlarında vurğulamışdır ki, qanunun aliliyi, ədalət prinsipi və vətəndaşların hüquqlarının qorunması dövlət siyasətinin prioritet istiqamətlərindəndir. Heç bir şəxs və ya qurum haqqında hüquqi təsdiqini tapmamış məlumatların hökm kimi təqdim olunması nə etik baxımdan, nə də hüquqi baxımdan doğru hesab edilə bilməz.
Son dövrlərdə “Uluturan” və “Göktürk” şirkətlərinin fəaliyyəti ilə bağlı müxtəlif media resurslarında səsləndirilən iddialar ictimai müzakirə predmetinə çevrilmişdir. Lakin xüsusi olaraq vurğulanmalıdır ki, adıçəkilən şirkətlərin fəaliyyəti ilə bağlı səsləndirilən fikirlərin hüquqi müstəvidə tam təsdiqini tapdığı barədə rəsmi qərar və ya hüquqi nəticə ictimaiyyətə təqdim edilməmişdir. Bu baxımdan, hər hansı şirkəti və ya şəxsi yalnız iddialar üzərindən ittiham etmək hüququn əsas prinsiplərinə zidd yanaşma sayıla bilər.
Jurnalistikanın əsas missiyası həqiqəti araşdırmaq, balanslı mövqe nümayiş etdirmək və qarşı tərəfin mövqeyinə də yer verməkdir. Bir şirkətin fəaliyyəti haqqında tənqidi yazılar hazırlanarkən yalnız iddia sahibinin fikrinə əsaslanmaq deyil, eyni zamanda həmin şirkətin izahını, hüquqi sənədlərini və mövqeyini də dinləmək vacibdir. Əks halda, qərəzli və birtərəfli informasiya cəmiyyətdə yanlış təsəvvür formalaşdıra bilər.
“Uluturan” və “Göktürk” şirkətlərinin adının müxtəlif ittihamlarla hallandırılması onların fəaliyyətinin tam şəkildə qanunsuz olması anlamına gəlmir. Hüquqi dövlət prinsiplərinə əsasən, hər bir ittiham yalnız məhkəmə və aidiyyəti dövlət qurumlarının araşdırmasından sonra hüquqi qiymətini almalıdır. Bu günə qədər isə şirkətlərin fəaliyyəti barədə səsləndirilən bəzi iddiaların öz hüquqi təsdiqini tapmadığı da diqqətdən yayınmamalıdır.
Bəzi hallarda emosional yanaşmalar və fərdi narazılıqlar mediada genişləndirilərək cəmiyyətə yekun hökm kimi təqdim edilir. Halbuki, qanun qarşısında hər bir şəxs və şirkət təqsirsizlik prezumpsiyasına malikdir. Bu isə o deməkdir ki, hüquqi qərar olmadan kimisə günahkar elan etmək nə vicdana, nə peşə etikasına, nə də qanunlara uyğun gəlir.
Azərbaycan Prezidenti İlham Əliyev demişdir: “Biz hüquqi dövlət qururuq və qanun aliliyi təmin edilməlidir.” Məhz buna görə də, hər hansı şəxs və ya şirkət haqqında fikir formalaşdırarkən emosiyalara deyil, hüquqa, sübuta və obyektiv araşdırmaya əsaslanmaq lazımdır. Çünki böhtan və şər xarakterli yazılar yalnız ayrı-ayrı insanlara deyil, bütövlükdə cəmiyyətin informasiya etimadına da zərbə vurur.