Milli Qəhrəman Maşallah Abdullayevin layiqli övladı – Gülxanım Abdullayevanın rəhbərliyi ilə Goranboyda gələcəyin vətənpərvər gəncləri yetişir

Azərbaycanın qədim və qəhrəmanlıq ruhu ilə seçilən bölgələrindən biri olan Goranboy şəhəri bu gün də özünün zəhmətkeş, qonaqpərvər və Vətənə bağlı insanları ilə tanınır. Bu torpağın insanlarında mərdlik, vətənpərvərlik, sadəlik və insanlıq kimi ali keyfiyyətlər nəsildən-nəslə ötürülür. Xüsusilə Vətən uğrunda canından keçən igid oğulların yetişdiyi Goranboy torpağı hər zaman Azərbaycanın qəhrəmanlıq salnaməsində xüsusi yer tutub.
Bu gün Goranboyun inkişafında və gələcəyinin formalaşmasında təhsil müəssisələrinin rolu danılmazdır. Çünki məktəb yalnız elm ocağı deyil, həm də şəxsiyyət yetişdirən, vətənpərvərlik ruhu formalaşdıran müqəddəs bir məkandır. Bu baxımdan Goranboy şəhər 1 nömrəli tam orta ümumtəhsil məktəbi öz fəaliyyəti ilə xüsusi seçilən təhsil ocaqlarından biridir.
Məktəbin direktor əvəzi Gülxanım Abdullayeva rəhbərliyi altında burada həyata keçirilən tədbirlər, maarifləndirici layihələr və tərbiyəvi fəaliyyətlər şagirdlərin yaddaşında silinməz izlər buraxır. Məktəbdə uşaqların yalnız savadlı deyil, həm də milli-mənəvi dəyərlərə bağlı, Vətənini sevən, insanpərvər gənclər kimi yetişməsi üçün məqsədyönlü iş aparılır.
Burada şagirdlərə Vətən, torpaq anlayışı sadəcə dərsliklər vasitəsilə deyil, real həyat nümunələri və mənəvi tərbiyə yolu ilə aşılanır. Məktəbdə keçirilən vətənpərvərlik tədbirləri, şəhidlərin xatirəsinə həsr olunan görüşlər, tarixi günlərə aid təşkil olunan proqramlar gənc nəslin milli ruhda böyüməsinə mühüm töhfə verir.
Gülxanım Abdullayevanın bu istiqamətdə fəaliyyəti isə təsadüfi deyil. Çünki o, Azərbaycanın Milli Qəhrəmanı Maşallah Abdullayevin yeganə övladıdır. Belə bir qəhrəman ocağında böyümək, Vətən sevgisini ailədən öyrənmək onun fəaliyyətində və həyata baxışında öz əksini tapır. Elə buna görə də şagirdlər üçün Milli Qəhrəman övladından təhsil almaq böyük qürur və fəxr mənbəyidir.
Bu məktəbdə keçirilən tədbirlər şagirdlərin uşaqlıq və yeniyetməlik illərini daha mənalı edir. Tarixi günlərin, milli bayramların, əlamətdar hadisələrin yüksək səviyyədə təşkili şagirdlərdə həm milli kimlik hissini gücləndirir, həm də onların gələcək həyatında unudulmaz xatirələrə çevrilir.
Xüsusilə 10 may – Ümummilli lider Heydər Əliyevin anım günü münasibətilə məktəbdə təşkil olunan tədbirlər böyük maraqla qarşılanır. Dahi şəxsiyyətin həyat və fəaliyyətindən bəhs edən videoçarxlar, ədəbi-bədii kompozisiyalar və təqdimatlar vasitəsilə şagirdlərə Heydər Əliyev ideyalarının mahiyyəti aşılanır. Bu tədbirlər gənc nəslin dövlətçilik düşüncəsinin formalaşmasına mühüm təsir göstərir.
Eyni zamanda məktəbdə humanist dəyərlərin təbliği də xüsusi diqqət mərkəzindədir. Gülxanım xanım şagirdlərə xeyirxahlıq etməyi, mərhəmətli olmağı, paylaşmağı bacarmağı, insanlarla düzgün və sadə davranışı öyrətməyi vacib hesab edir. Məktəbdə yaradılan sağlam mənəvi mühit uşaqların gələcək həyatına müsbət təsir göstərir.
Burada təhsil alan şagirdlər yalnız orta məktəbi bitirmirlər, eyni zamanda həyata hazır, savadlı, milli ruhda böyüyən vətəndaşlar kimi formalaşırlar. Bu uğurların arxasında isə məktəbin pedaqoji kollektivinin zəhməti və rəhbərliyin düzgün idarəçilik prinsipləri dayanır.
Şəhid ailələrinə, qazilərə və onların yaxınlarına göstərilən diqqət və qayğı da Gülxanım Abdullayevanın əsas insani xüsusiyyətlərindən biri kimi hər zaman hiss olunur. Dövlətə və dövlətçiliyə sədaqət, müəllim peşəsinə sevgi və insanlara hörmət onun fəaliyyətində əsas prinsiplər kimi özünü göstərir.
Bu gün Goranboy şəhər 1 nömrəli tam orta ümumtəhsil məktəbi təkcə bir təhsil müəssisəsi deyil, həm də gələcəyin vətənpərvər, savadlı və mənəviyyatlı gənclərinin yetişdiyi müqəddəs bir elm və tərbiyə ocağıdır.