Uşaqların sevimli həkimi-Sağlam gələcəyin keşikçisi: Bəxtiyar Qarayev

"Uşaqlar bizim gələcəyimizdir, gələcəyimizə isə ən böyük qayğı göstərilməlidir." – Ümummilli Lider Heydər Əliyevin bu fikri Azərbaycan dövlətinin uşaqlara, onların sağlamlığına və xoşbəxt gələcəyinə verdiyi önəmin ən dolğun ifadəsidir. Dahi lider hər zaman uşaqların sağlam böyüməsini, yüksək səviyyədə tibbi xidmətlə əhatə olunmasını dövlət siyasətinin prioritet istiqamətlərindən biri hesab etmişdir. Bu siyasət bu gün də Azərbaycan Respublikasının Prezidenti cənab İlham Əliyevin rəhbərliyi altında uğurla davam etdirilir. Ölkənin hər yerində yeni xəstəxanaların, müasir klinikaların tikilməsi, səhiyyə sisteminin yenilənməsi, tibb işçilərinə göstərilən diqqət və qayğı məhz bu siyasətin nəticəsidir.Azərbaycan səhiyyəsi zəngin inkişaf yolu keçib. Xüsusilə müstəqillik illərində səhiyyə sistemində həyata keçirilən islahatlar nəticəsində ölkəmizdə müasir standartlara cavab verən klinikalar formalaşıb. Əvvəllər əhalinin böyük hissəsi yalnız dövlət xəstəxanalarının xidmətlərindən istifadə edirdisə, sonrakı illərdə özəl və ixtisaslaşmış klinikaların yaradılması tibbi xidmətlərin keyfiyyətini daha da yüksəldib.Klinikalar və xəstəxanalar eyni məqsədə – insan sağlamlığının qorunmasına xidmət etsələr də, onların fəaliyyət istiqamətlərində müəyyən fərqlər mövcuddur. Xəstəxanalar əsasən stasionar müalicə, cərrahi əməliyyatlar və ağır xəstələrin müalicəsi ilə məşğul olur. Klinikalarda isə daha çox diaqnostika, ambulator müalicə, profilaktik tədbirlər, ixtisaslaşmış tibbi xidmətlər və fərdi yanaşma ön planda dayanır. Müasir tibbin inkişafı nəticəsində klinikalar insanların vaxtında müayinə və müalicə almasına, xəstəliklərin erkən aşkarlanmasına mühüm töhfə verir.Bu gün Azərbaycanda fəaliyyət göstərən və vətəndaşların etimadını qazanan tibb müəssisələri sırasında MediPlanet Klinikası xüsusi yer tutur. Müasir tibbi avadanlıqları, peşəkar həkim kollektivi, pasiyentlərə göstərilən yüksək diqqət və qayğı bu klinikanı insanların ən çox müraciət etdiyi ünvanlardan birinə çevirib. Burada çalışan həkimlərin əsas məqsədi yalnız xəstəliyi müalicə etmək deyil, həm də insanlara sağlam həyat bəxş etməkdir.
MediPlanet Klinikasının tanınan və sevilən simalarından biri isə pediatr həkim Bəxtiyar Qarayevdir. Onun həyat yolu həkimlik peşəsinə sədaqətin, insanlara xidmətin və uşaqlara sonsuz sevginin nümunəsidir.
Bəxtiyar Qarayev 1986-1994-cü illərdə Azərbaycan Dövlət Tibb Universitetinin Pediatriya fakültəsində təhsil alaraq həkimlik peşəsinin sirlərinə yiyələnib. Sonrakı illərdə pediatrik pulmonologiya sahəsində fəaliyyət göstərərək böyük təcrübə qazanıb. O, uzun illər ərzində uşaqlarda tənəffüs sistemi xəstəliklərinin, o cümlədən pnevmoniya, bronxit, rinit və digər xəstəliklərin diaqnostikası və müalicəsi ilə məşğul olub.Bununla yanaşı, infeksion xəstəliklər, allergik problemlər, mədə-bağırsaq sistemi xəstəlikləri, iştahasızlıq və çəki problemləri, helmintozlar – askaridoz, lyamblioz və digər xəstəliklərin müalicəsində də yüksək peşəkarlıq nümayiş etdirib. Onun tibbi biliyi, zəngin təcrübəsi və pasiyentlərinə fərdi yanaşması valideynlərin böyük etimadını qazanıb.Peşəkar fəaliyyəti dövründə Bəxtiyar həkimin əməyi müxtəlif mükafatlarla da qiymətləndirilib. O, 2011-ci ildə Ankara Tibb Mərkəzi tərəfindən "İlin həkimi" adına layiq görülüb. 2015-ci ildə isə "Şəfalı Əllər" Fəxri Diplomuna layiq görülərək səhiyyə sahəsindəki xidmətlərinə görə təltif olunub.
Lakin Bəxtiyar Qarayevi valideynlərin və uşaqların gözündə sevdirən əsas xüsusiyyət onun yüksək peşəkarlığından da əvvəl gələn insani keyfiyyətləridir. O, hər bir uşağa böyük sevgi, qayğı və həssaslıqla yanaşır. Həkim qəbuluna qorxu ilə gələn uşağın üzündə təbəssüm yaratmaq, valideynlərin narahatlığını azaltmaq, balaca pasiyentlərin etimadını qazanmaq hər həkimə nəsib olmur.Uşaqlara olan sonsuz məhəbbət, onların sağlam və xoşbəxt böyüməsini görmək arzusu Bəxtiyar həkimi məhz pediatriya sahəsinə gətirib çıxarıb. O, peşəsini sadəcə iş yeri kimi deyil, həyat missiyası kimi qəbul edir. Onun üçün hər sağalan uşaq bir uğur, hər təbəssüm bir mükafatdır.
Bu gün ölkəmizdə səhiyyə işçilərinə göstərilən diqqət və qayğının nəticəsidir ki, belə peşəkar həkimlər öz fəaliyyətlərini daha böyük həvəslə davam etdirirlər. Dövlət tərəfindən səhiyyə sahəsinə ayrılan diqqət, yeni tibb müəssisələrinin yaradılması, müasir avadanlıqların gətirilməsi və həkimlərin peşə hazırlığının artırılması Azərbaycan səhiyyəsinin inkişafına mühüm töhfə verir.Təsadüfi deyil ki, hər il iyunun 17-si Azərbaycanda Tibb İşçilərinin Peşə Bayramı Günü kimi qeyd olunur. Bu tarix Azərbaycan Xalq Cümhuriyyəti dövründə – 1918-ci il iyunun 17-də ölkənin ilk Səhiyyə Nazirliyinin yaradılması ilə bağlıdır. Prezident İlham Əliyevin müvafiq Sərəncamı ilə təsis olunan bu əlamətdar gün səhiyyə işçilərinin cəmiyyət qarşısındakı xidmətlərinin yüksək qiymətləndirilməsinin ifadəsidir.Həkimlər insanların ən çətin anlarında yanında olan, onların sağlamlığı və həyatı uğrunda mübarizə aparan müqəddəs peşə sahibləridir. Onlar gecə-gündüz demədən insanların sağlamlığı naminə çalışır, ümidləri tükənən insanlara yenidən yaşamaq sevinci bəxş edirlər. Bu baxımdan, səhiyyə işçiləri hər zaman xüsusi hörmət və ehtirama layiqdirlər.17 İyun – Tibb İşçilərinin Peşə Bayramı münasibətilə bütün səhiyyə əməkdaşlarını, xüsusilə də ömrünü uşaqların sağlamlığına həsr edən, peşəkarlığı, insanpərvərliyi və qayğıkeşliyi ilə seçilən MediPlanet Klinikasının sevilən pediatrı Bəxtiyar Qarayevi ürəkdən təbrik edir, ona möhkəm can sağlığı, uzun ömür, şərəfli fəaliyyətində yeni uğurlar arzulayırıq.Çünki uşaqların sağlamlığına xidmət etmək gələcəyə xidmət etmək deməkdir. Gələcəyin sağlam və xoşbəxt olması üçün çalışan belə həkimlər isə cəmiyyətimizin ən böyük sərvətlərindən biridir.